Tum Kahaan Jao Ge

Habs-e-Duniya Se Guzar Jatay Hain
Aisa Kartay Hain Ke Mar Jatay Hain

Kaisay Hotay Hain Bicharnay Waalay ?
Hum Ye Sochain Bhee Tou Dar Jatay Hain

Dil Jo Tootay Tou Sar-e-Mehfil Bhi
Baal Be-Wajaa Bikhar Jatay Hain

Ab Na Dekho Meri Banjar Aankhain
Charhtay Darya Tou Utar Jatay Hain

Dhoop Ka Roop Rachaanay Waalay
Shaam Ko Aur Nikhar Jatay Hain

Tum Kahaan Jao Ge Socho Mohsin ?
Log Thak Haar Ke Ghar Jatay Hain
"Mohsin Naqvi Urdu Poetry"